ഉച്ചയോടെ പൂവാട്ടുപറമ്പിലും ബസ് സര്‍വീസ് നിര്‍ത്തലാക്കിയതിനാല്‍ ജനം ബുദ്ധിമുട്ടിലായി. രണ്ടുദിവസംമുമ്പ് വാഴക്കാടുവെച്ച് എടവണ്ണപ്പാറ റൂട്ടിലോടുന്ന ജന്ന മോള്‍ ബസ് സ്റ്റാന്‍ഡിനുള്ളില്‍ കയറുകയോ വേണ്ടത്ര വിദ്യാര്‍ഥികളെ കയറാനനുവദിക്കുകയോ ചെയ്യുന്നില്ലെന്നാരോപിച്ച് നാട്ടുകാരും വിദ്യാര്‍ഥികളും ബസ് തടഞ്ഞത് സംഘര്‍ഷത്തിനിടയാക്കിയിരുന്നു. സംഘട്ടനത്തില്‍ പരിക്കുപറ്റിയ ഡ്രൈവര്‍ അബ്ദുല്‍ ഖാദറിനെയും ചില വിദ്യാര്‍ഥികളെയും ആശുപത്രിയില്‍ പ്രവേശിപ്പിക്കുകയും ചെയ്തിരുന്നു. വാഴക്കാട് എസ്.ഐ വേലായുധന്റെ സാന്നിധ്യത്തില്‍ പ്രശ്‌നം ഒത്തുതീരാത്തതിനെ തുടര്‍ന്ന് ബസ് ജീവനക്കാര്‍ പൂവാട്ടുപറമ്പില്‍ ബസ് തടയുകയായിരുന്നു. ഇതേത്തുടര്‍ന്ന് മാവൂര്‍, കൂളിമാട്, മുക്കം, മെഡിക്കല്‍ കോളജ്, കോഴിക്കോട് ഭാഗങ്ങളിലേക്ക് യാത്രചെയ്ത ഒട്ടേറെ വിദ്യാര്‍ഥികളും നാട്ടുകാരും ബുദ്ധിമുട്ടിലായി. മെഡിക്കല്‍ കോളജ് പൊലീസും ട്രാഫിക് പൊലീസും എത്തിയെങ്കിലും ഭാഗികമായേ ബസ് സര്‍വീസ് നടത്തിയിരുന്നുള്ളൂ. മിന്നല്‍ പണിമുടക്ക് നടത്തി യാത്രക്കാരെ ദുരിതത്തിലാക്കാന്‍ അനുവദിക്കില്ലെന്ന് നാട്ടുകാര്‍ പറഞ്ഞു. മിന്നല്‍ പണിമുടക്കിന് കൂട്ടുനില്‍ക്കില്ലെന്ന് ബസ് ഓണേഴ്‌സ് അസോസിയേഷന്‍ പ്രതിനിധികളും അറിയിച്ചു.