കുറ്റിക്കാട്ടൂര്‍ : പ്രകൃതി ചികിത്സകനും പ്രഭാഷകനുമായ പയ്യടിമത്തേല്‍ സ്വദേശി ഡോ. ടി.കെ. അബ്ദുല്‍റസാഖിന്‍െറ തിരോധാനവുമായി ബന്ധപ്പെട്ട് ദുരൂഹത നീങ്ങിയില്ല. കോഴിക്കോട് നഗരത്തിലുള്ള ഇദ്ദേഹത്തിന്‍െറ കാലിക്കറ്റ് റിസര്‍ച് സെന്‍റര്‍ എന്ന സ്ഥാപനത്തിലും പയ്യടിമീത്തലിലെ വീട്ടിലും നല്ലളം എസ്.ഐ ജി. ഗോപകുമാറിന്‍െറ നേതൃത്വത്തില്‍ പൊലീസ് പരിശോധന നടത്തിയെങ്കിലും സംശയിക്കത്തക്ക തെളിവുകളൊന്നും ലഭിച്ചിട്ടില്ല.
ശനിയാഴ്ചയാണ് അബ്ദുല്‍റസാഖിനെ കാണാതായ വാര്‍ത്ത സ്വന്തം ഫേസ്ബുക്കിലൂടെ മറ്റുള്ളവരുടെ ശ്രദ്ധയില്‍പ്പെടുന്നത്. തന്നെ കാറിലെത്തിയ ഒരു സംഘമാളുകള്‍ തട്ടിക്കൊണ്ടുപോയി തടവിലാക്കിയതായും കൊല്ലാന്‍ പദ്ധതിയിട്ടതായുമാണ് ഇംഗ്ളീഷില്‍ വിശദമായെഴുതിയ പോസ്റ്റിലുള്ളത്. കൈവശമുള്ള ഫോണ്‍ സംഘം പിടിച്ചെടുത്തതിനാല്‍ മറ്റൊരു ഫോണില്‍നിന്നാണ് ടൈപ്പ് ചെയ്ത് പോസ്റ്റിട്ടതെന്ന് ഫേസ്ബുക്കില്‍ വിശദീകരിക്കുന്നുണ്ട്. എന്നാല്‍, ജീവന് ഭീഷണിയുള്ള ഒരാള്‍ക്ക് അക്ഷരത്തെറ്റില്ലാതെ വിശദമായി എങ്ങനെ ഫോണില്‍നിന്ന് ടൈപ് ചെയ്യാന്‍ കഴിഞ്ഞുവെന്നത് സംശയം ജനിപ്പിക്കുന്നുണ്ട്. മാത്രമല്ല, ഫേസ്ബുക് പോസ്റ്റിന് പുറമെ ഒരു വിദ്യാര്‍ഥിക്കും തനിക്ക് ക്ളാസെടുക്കാന്‍ വരാനാകില്ലെന്ന സന്ദേശമയച്ചിട്ടുണ്ട്.
ഇത്രക്ക് വിശദമായ പോസ്റ്റും ഫോണ്‍സന്ദേശവുമയച്ച ആള്‍, അടുത്ത സുഹൃത്തുക്കള്‍ക്കോ ബന്ധുക്കള്‍ക്കോ ഇത്തരം വിവരങ്ങളൊന്നുമയക്കാത്തതും സംശയകരമാണ്. വിവാഹമോചിതനായി ഏറെക്കാലമായി ഒറ്റക്ക് താമസിക്കുന്ന ഡോക്ടര്‍ ഇടക്ക് വീട്ടില്‍നിന്ന് മാറിനില്‍ക്കാറുണ്ടത്രെ. ഇത്തരം സംശയങ്ങളെക്കുറിച്ചും പൊലീസ് അന്വേഷിക്കുന്നുണ്ട്.