Thursday 11 October 2012
കൂളിമാട് കടവ് പാലം: അപ്രോച്ച് റോഡിന്‍െറ സര്‍വേ പൂര്‍ത്തിയായി
.jpg)
പി.ഡബ്ള്യു.ഡി, റവന്യൂ ഉദ്യോഗസ്ഥരുടെ നേതൃത്വത്തിലാണ് സര്‍വേ നടത്തിയത്. കൂളിമാട് കടവില്‍നിന്നും കൂളിമാട് അങ്ങാടിക്കു സമീപംവരെയുള്ള 210 മീറ്റര്‍ ദൂരത്തിലാണ് സര്‍വേ നടത്തിയത്. മൂന്നുവര്‍ഷം മുമ്പുതന്നെ റോഡിനുവേണ്ടി പ്രദേശവാസികള്‍ സ്ഥലം വിട്ടുനല്‍കിയിരുന്നു. ഇതാണ് ചൊവ്വാഴ്ച രാവിലെ മുതല്‍ അളന്ന് തിട്ടപ്പെടുത്തി അടയാളമിട്ടത്. ഇതനുസരിച്ച് ഒരു വീട് പൂര്‍ണമായി പൊളിച്ചുനീക്കേണ്ടി വരും. മറ്റൊരു വീടിനോട് ചേര്‍ന്നുകൊണ്ട് റോഡ് പോകുന്നതിനാല്‍ ആ വീട്ടുകാരെയും മാറ്റി താമസിപ്പിക്കേണ്ടി വരും. മറ്റ് വീടുകള്‍ക്കോ കെട്ടിടങ്ങള്‍ക്കോ ഭീഷണിയൊന്നുമില്ല. 17 പേര്‍ക്കാണ് സ്ഥലം നഷ്ടപ്പെടുക. 34 ലക്ഷം രൂപയാണ് സ്ഥലമേറ്റെടുക്കുമ്പോള്‍ ഉടമകള്‍ക്ക് നഷ്ടപരിഹാര തുകയായി നല്‍കുന്നതിന് നേരത്തെ സര്‍ക്കാര്‍ അനുവദിച്ചത്. തുക ഈ മാസം 15ന് വിതരണം ചെയ്യും.
പാലത്തിന്‍െറ മറുഭാഗത്ത് മലപ്പുറം ജില്ലയിലെ മപ്രം ഭാഗത്തെ അപ്രോച്ച് റോഡിനുള്ള സര്‍വേ നടപടികള്‍ ഈ മാസം തന്നെ പൂര്‍ത്തിയാക്കും. ഇവിടെയും നേരത്തെ തന്നെ പരിസരവാസികള്‍ വിട്ടുനല്‍കിയിട്ടുണ്ട്. അതുകൂടി പൂര്‍ത്തിയാകുന്നതോടെ പാലം നിര്‍മാണത്തിനുള്ള നടപടികള്‍ ആരംഭിക്കുമെന്ന് കണക്കാക്കപ്പെടുന്നത്.
300 മീറ്ററോളം നീളത്തില്‍ ഒമ്പതു തൂണുകളിലായി ആറ് മീറ്ററോളം വീതിയിലുള്ള പാലത്തിനാണ് രൂപരേഖ തയാറാക്കിയത്. 23 കോടി രൂപയാണ് ചെലവ് കണക്കാക്കുന്നത്.
കൂളിമാട്കടവില്‍ പാലം യാഥാര്‍ഥ്യമാകുകയാണെങ്കില്‍ കോഴിക്കോട്-മലപ്പുറം ജില്ലകളിലെ കിഴക്കന്‍ മലയോര പ്രദേശങ്ങളിലുള്ളവര്‍ക്ക് ഏറെ ഉപകാരമാകും.
സര്‍വേ നടപടികള്‍ക്ക് വാല്യേുഷന്‍ അസിസ്റ്റന്‍സ് വി.എ. റഫീഖ്, പി.ഡബ്ള്യു.ഡി അസി. എന്‍ജിനീയര്‍ ബൈജു, റവന്യൂ ഇന്‍സ്പെക്ടര്‍ കെ. സുബ്രഹ്മണ്യന്‍, പി.ഡബ്യു.ഡി ഓവര്‍സിയര്‍ പി.കെ. പുഷ്പരാജ്, സര്‍വേയര്‍മാരായ എം. രാജേഷ്, പി.കെ. സാനു തുടങ്ങിയവര്‍ നേതൃത്വം നല്കി.
Subscribe to:
Post Comments (Atom)
No comments:
Post a Comment